Nova Vulgata44,1Quibus transgressis, dixit Dominus ad Iosue:
Nova Vulgata4,2«Sumite vobis de populo duodecim viros singulos per singulas tribus
Nova Vulgata4,3et praecipite eis, ut tollant de medio Iordanis alveo, ubi firmiter steterunt sacerdotum pedes, duodecim lapides; quos portabitis vobiscum et ponetis in loco castrorum, ubi fixeritis hac nocte tentoria».
Nova Vulgata 4,4Vocavitque Iosue duodecim viros, quos elegerat de filiis Israel, singulos de tribubus singulis,
Nova Vulgata4,5et ait ad eos: «Ite ante arcam Domini Dei vestri ad Iordanis medium et portate singuli singulos lapides in umeris vestris, iuxta numerum tribuum filiorum Israel,
Nova Vulgata4,6ut sit hoc signum inter vos. Quando interrogaverint vos filii vestri cras dicentes: “Quid sibi volunt isti lapides?”,
Nova Vulgata4,7respondebitis eis: Defecerunt aquae Iordanis ante arcam foederis Domini, cum transiret eum; idcirco positi sunt lapides isti in monumentum filiis Israel usque in aeternum».
Nova Vulgata 4,8Fecerunt ergo filii Israel, sicut eis praecepit Iosue, portantes de medio Iordanis alveo duodecim lapides, ut ei Dominus imperarat, iuxta numerum tribuum filiorum Israel, usque ad locum, in quo castrametati sunt; ibique posuerunt eos.
Nova Vulgata4,9Alios quoque duodecim lapides posuit Iosue in medio Iordanis alveo, ubi steterunt sacerdotes, qui portabant arcam foederis; et sunt ibi usque in praesentem diem.
Nova Vulgata4,10Sacerdotes autem, qui portabant arcam, stabant in Iordanis medio, donec omnia complerentur, quae Iosue ut loqueretur ad populum praeceperat Dominus secundum omnia, quae dixerat ei Moyses. Festinavitque populus et transiit.
Nova Vulgata4,11Cumque transissent omnes, transivit et arca Domini; sacerdotesque pergebant ante populum.
Nova Vulgata4,12Filii quoque Ruben et Gad et dimidia tribus Manasse armati praecedebant filios Israel, sicut eis praeceperat Moyses;
Nova Vulgata4,13quadraginta fere milia expeditorum ad pugnam incedebant coram Domino in campestria Iericho.
Nova Vulgata 4,14In illo die magnificavit Dominus Iosue coram omni Israel, ut timerent eum, sicut timuerant Moysen, omnibus diebus vitae suae.
Nova Vulgata4,15Dixitque ad eum:
Nova Vulgata4,16«Praecipe sacerdotibus, qui portant arcam testimonii, ut ascendant de Iordane».
Nova Vulgata4,17Qui praecepit eis dicens: «Ascendite de Iordane».
Nova Vulgata4,18Cumque ascendissent portantes arcam foederis Domini et siccam humum calcare coepissent, reversae sunt aquae in alveum suum et fluebant sicut ante super omnes ripas suas.
Nova Vulgata 4,19Populus autem ascendit de Iordane decimo die mensis primi, et castrametati sunt in Galgalis, in termino orientali Iericho.
Nova Vulgata4,20Duodecim quoque lapides, quos de Iordanis alveo sumpserant, posuit Iosue in Galgalis.
Nova Vulgata4,21Et dixit ad filios Israel: «Quando interrogaverint filii vestri cras patres suos et dixerint eis: “Quid sibi volunt isti lapides?”,
Nova Vulgata4,22docebitis eos atque dicetis: Per arentem alveum transivit Israel Iordanem istum,
Nova Vulgata4,23siccante Domino Deo vestro aquas eius in conspectu vestro, donec transiretis,
Nova Vulgata4,24sicut fecerat prius in mari Rubro, quod siccavit coram nobis, donec transiremus,
Nova Vulgata4,25ut cognoscant omnes terrarum populi fortissimam Domini manum, et ut vos timeatis Dominum Deum vestrum omni tempore».