Nova Vulgata4646,1Fortis in bello Iesus filius Nun, successor Moysi in prophetis, qui fuit secundum nomen suum
Nova Vulgata 46,2maximus in salutem electorum Dei, qui vindicet in insurgentes hostes, ut heredem faciat Israel.
Nova Vulgata 46,3Quam gloriam adeptus est in tollendo manus suas et iactando contra civitatem acinacem!
Nova Vulgata 46,4Quis ante illum restitit? Nam bella Domini ipse perduxit.
Nova Vulgata 46,5An non in manu eius impeditus est sol, et una dies facta est quasi duo?
Nova Vulgata 46,6Invocavit Altissimum potentem in oppugnando inimicos undique; et audivit illum magnus Dominus in saxis grandinis virtutis valde fortis.
Nova Vulgata 46,7Impetum fecit contra gentem hostilem et in descensu perdidit contrarios,
Nova Vulgata 46,8ut cognoscant gentes armaturam eius, quia contra Deum bellum eorum est: etenim secutus est a tergo Potentis.
Nova Vulgata 46,9Et in diebus Moysi misericordiam fecit, ipse et Chaleb filius Iephonne, stare contra congregationem, prohibere gentem a peccatis et perfringere murmur malitiae.
Nova Vulgata 46,1010 Ideo et ipsi duo liberati sunt a numero sescentorum milium peditum, ut inducerent illos in hereditatem, in terram, quae manat lac et mel.
Nova Vulgata 46,11Et dedit Dominus ipsi Chaleb fortitudinem, et usque in senectutem permansit illi, ut ascenderet in excelsum terrae locum; et semen ipsius obtinuit hereditatem,
Nova Vulgata 46,12ut viderent omnes filii Israel quia bonum est obsequi Domino.
Nova Vulgata 46,13Et iudices singuli suo nomine, quorum non est corruptum cor, qui non aversi sunt a Domino:
Nova Vulgata 46,14sit memoria illorum in benedictione, et ossa eorum pullulent de loco suo,
Nova Vulgata 46,15et nomen eorum renovet filiis illorum sanctorum virorum.
Nova Vulgata 46,16Dilectus a Domino suo Samuel propheta Domini instituit imperium et unxit principes in gente sua.
Nova Vulgata 46,17In lege Domini congregationem iudicavit, et visitavit Deus Iacob, et in fide sua probatus est propheta;
Nova Vulgata 46,18et cognitus est in verbis suis fidelis in visione.
Nova Vulgata 46,19Et invocavit Dominum omnipotentem, in oppugnando hostes circumstantes undique, in oblatione agni lactentis.
Nova Vulgata 46,20Et intonuit de caelo Dominus et in sonitu magno auditam fecit vocem suam
Nova Vulgata 46,21et contrivit principes Tyriorum et omnes duces Philisthim.
Nova Vulgata 46,22Et ante tempus dormitionis aeternae testimonium praebuit in conspectu Domini et christi eius: «Pecunias et usque ad calceamenta ab omni carne non accepi»; et non accusavit illum homo.
Nova Vulgata 46,23Et, postquam dormivit, prophetavit et notum fecit regi et ostendit illi finem vitae suae et exaltavit vocem suam de terra in prophetia ad delendam impietatem gentis.
