Nova Vulgata2525,1Si fuerit causa inter aliquos, et interpellaverint iudices, quem iustum esse perspexerint, illi iustitiae palmam dabunt; quem impium, condemnabunt impietatis.
Nova Vulgata25,2Sin autem iudex eum, qui peccavit, dignum viderit plagis, prosternet et coram se faciet verberari; pro mensura peccati erit et plagarum modus,
Nova Vulgata25,3ita dumtaxat, ut quadragenarium numerum non excedant, ne ultra percussus plagis multis et foede laceratus ante oculos tuos abeat frater tuus.
Nova Vulgata 25,4Non ligabis os bovis terentis in area fruges tuas.
Nova Vulgata 25,5Quando habitaverint fratres simul, et unus ex eis absque filio mortuus fuerit, uxor defuncti non nubet foras alteri, sed accipiet eam frater eius uxorem et suscitabit semen fratris sui;
Nova Vulgata25,6et primogenitum ex ea filium nomine illius appellabit, ut non deleatur nomen eius ex Israel.
Nova Vulgata25,7Sin autem noluerit accipere uxorem fratris sui, quae ei lege debetur, perget mulier ad portam civitatis et interpellabit maiores natu dicetque: “Non vult frater viri mei suscitare nomen fratris sui in Israel nec me in coniugium sumere”;
Nova Vulgata25,8statimque accersiri eum facient et interrogabunt. Si responderit: “Nolo eam uxorem accipere”,
Nova Vulgata25,9accedet mulier ad eum coram senioribus et tollet calceamentum de pede eius spuetque in faciem illius et dicet: “Sic fit homini, qui non aedificat domum fratris sui”.
Nova Vulgata25,10Et vocabitur nomen illius in Israel: “Domus discalceati”.
Nova Vulgata 25,11Si habuerint inter se iurgium viri, et unus contra alterum rixari coeperit, volensque uxor alterius eruere virum suum de manu fortioris, miserit manum et apprehenderit verenda eius,
Nova Vulgata25,12abscides manum illius nec flecteris super eam ulla misericordia.
Nova Vulgata 25,13Non habebis in sacculo tuo diversa pondera maius et minus;
Nova Vulgata25,14nec erit in domo tua ephi maius et minus.
Nova Vulgata25,15Pondus habebis iustum et verum, et ephi iustum et verum erit tibi, ut multo vivas tempore super terram, quam Dominus Deus tuus dederit tibi.
Nova Vulgata25,16Abominatur enim Dominus tuus eum, qui facit haec, et aversatur omnem iniustitiam.
Nova Vulgata 25,17Memento quae fecerit tibi Amalec in via, quando egrediebaris ex Aegypto;
Nova Vulgata25,18quomodo occurrerit tibi et omnes extremos agminis tui, qui lassi residebant, ceciderit, quando tu eras fame et labore confectus, et non timuerit Deum.
Nova Vulgata25,19Cum ergo Dominus Deus tuus dederit tibi requiem a cunctis per circuitum inimicis tuis in terra, quam tibi daturus est, delebis nomen Amalec sub caelo: cave, ne obliviscaris!
