Nova Vulgata55,1Post haec ingressi sunt Moyses et Aaron et dixerunt pharaoni: «Haec dicit Dominus, Deus Israel: Dimitte populum meum, ut sacrificet mihi in deserto».
Nova Vulgata5,2At ille responclit: «Quis est Dominus, ut audiam vocem eius et dimittam Israel? Nescio Dominum et Israel non dimittam».
Nova Vulgata5,3Dixeruntque: «Deus Hebraeorum occurrit nobis; eamus, quaeso, viam trium dierum in solitudinem et sacrificemus Domino Deo nostro, ne forte accidat nobis pestis aut gladius».
Nova Vulgata5,4Ait ad eos rex Aegypti: «Quare, Moyses et Aaron, sollicitatis populum ab operibus suis? Ite ad onera vestra».
Nova Vulgata5,5Dixitque pharao: «Multus nimis iam est populus terrae; videtis quod turba succreverit; quanto magis si dederitis eis requiem ab operibus?».
Nova Vulgata 5,6Praecepit ergo in die illo exactoribus populi et praefectis eius dicens:
Nova Vulgata5,7«Nequaquam ultra dabitis paleas populo ad conficiendos lateres sicut prius, sed ipsi vadant et colligant stipulas.
Nova Vulgata5,8Et mensuram laterum, quam prius faciebant, imponetis super eos; nec minuetis quidquam. Vacant enim et idcirco vociferantur dicentes: “Eamus et sacrificemus Deo nostro”.
Nova Vulgata5,9Opprimantur operibus et expleant ea, ut non acquiescant verbis mendacibus».
Nova Vulgata 5,10Igitur egressi exactores populi et praefecti eius dixerunt ad populum: «Sic dicit pharao: “Non do vobis paleas.
Nova Vulgata5,11Ite et colligite, sicubi invenire poteritis, nec minuetur quid quam de opere vestro”».
Nova Vulgata5,12Dispersusque est populus per omnem terram Aegypti ad colligendas paleas.
Nova Vulgata5,13Exactores quoque instabant dicentes: «Complete opus vestrum cotidie, ut prius facere solebatis, quando dabantur vobis paleae».
Nova Vulgata5,14Flagellatique sunt praefecti filiorum Israel, quos constituerant super eos exactores pharaonis dicentes: «Quare non implestis mensuram laterum sicut prius, nec heri nec hodie?».
Nova Vulgata 5,15Veneruntque praefecti filiorum Israel et vociferati sunt ad pharaonem dicentes: «Cur ita agis contra servos tuos?
Nova Vulgata5,16Paleae non dantur nobis, et lateres similiter imperantur; en famuli tui flagellis caedimur, et populus tuus est in culpa».
Nova Vulgata5,17Qui ait: «Vacatis otio et idcirco dicitis: “Eamus et sacrificemus Domino”.
Nova Vulgata5,18Ite ergo et operamini; paleae non dabuntur vobis, et reddetis consuetum numerum laterum».
Nova Vulgata 5,19Videbantque se praefecti filiorum Israel in malo, eo quod diceretur eis: «Non minuetur quidquam de lateribus per singulos dies»;
Nova Vulgata5,20occurreruntque Moysi et Aaron, qui stabant ex adverso egredientibus a pharaone,
Nova Vulgata5,21et dixerunt ad eos: «Videat Dominus et iudicet, quoniam foetere fecistis odorem nostrum coram pharaone et servis eius; et praebuistis ei gladium, ut occideret nos».
Nova Vulgata5,22Reversusque est Moyses ad Dominum et ait: «Domine, cur afflixisti populum istum? Quare misisti me?
Nova Vulgata5,23Ex eo enim quo ingressus sum ad pharaonem, ut loquerer in nomine tuo, afflixit populum tuum; et non liberasti eos».