Nova Vulgata 26,2«Quomodo adiuvisti imbecillem? Et sustentas brachium eius, qui non est fortis?
Nova Vulgata 26,3Quod dedisti illi consilium, qui non habet sapientiam? Et prudentiam tuam ostendisti plurimam!
Nova Vulgata 26,4Quem docere voluisti? Et cuius est spiritus, qui egreditur ex te?
Nova Vulgata 26,5Ecce umbrae gemunt sub aquis, et qui habitant cum eis.
Nova Vulgata 26,6Nudus est infernus coram illo, et nullum est operimentum Perditioni.
Nova Vulgata 26,7Qui extendit aquilonem super vacuum et appendit terram super nihilum.
Nova Vulgata 26,8Qui ligat aquas in nubibus suis, ut non erumpant pariter deorsum.
Nova Vulgata 26,9Qui operit faciem solii sui expandens super illud nebulam suam.
Nova Vulgata 26,10Terminum circumdedit aquis, usque dum finiantur lux et tenebrae.
Nova Vulgata 26,11Columnae caeli contremiscunt et pavent ab increpatione eius.
Nova Vulgata 26,12In fortitudine sua terruit mare et prudentia sua percussit Rahab.
Nova Vulgata 26,13Spiritus eius serenavit caelos, et manus eius confodit colubrum fugientem.
Nova Vulgata 26,14Ecce haec sunt termini viarum eius; et, cum vix parvam stillam sermonis eius audierimus, quis poterit tonitruum magnitudinis illius intueri?».