Nova Vulgata2525,1Locutusque est Dominus ad Moysen dicens:
Nova Vulgata25,2«Loquere filiis Israel, ut tollant mihi donaria; ab omni homine, qui offert ultroneus, accipietis ea.
Nova Vulgata25,3Haec sunt autem, quae accipere debetis: aurum et argentum et aes,
Nova Vulgata25,4hyacinthum et purpuram coccumque et byssum, pilos caprarum
Nova Vulgata25,5et pelles arietum rubricatas pellesque delphini et ligna acaciae,
Nova Vulgata25,6oleum ad luminaria concinnanda, aromata in unguentum et in thymiama boni odoris,
Nova Vulgata25,7lapides onychinos et gemmas ad ornandum ephod ac pectorale.
Nova Vulgata25,8Facientque mihi sanctuarium, et habitabo in medio eorum.
Nova Vulgata25,9Iuxta omnem similitudinem habitaculi, quam ostendam tibi, et omnium vasorum in cultum eius: sicque facietis illud.
Nova Vulgata 25,10Arcam de lignis acaciae compingent; cuius longitudo habeat duos semis cubitos, latitudo cubitum et dimidium, altitudo cubitum similiter ac semissem.
Nova Vulgata25,11Et deaurabis eam auro mundissimo intus et foris; faciesque supra coronam auream per circuitum
Nova Vulgata25,12et conflabis ei quattuor circulos aureos, quos pones in quattuor arcae pedibus: duo circuli sint in latere uno et duo in altero.
Nova Vulgata25,13Facies quoque vectes de lignis acaciae et operies eos auro;
Nova Vulgata25,14inducesque per circulos, qui sunt in arcae lateribus, ut portetur in eis;
Nova Vulgata25,15qui semper erunt in circulis nec umquam extrahentur ab eis.
Nova Vulgata25,16Ponesque in arcam testimonium, quod dabo tibi.
Nova Vulgata 25,17Facies et propitiatorium de auro mundissimo; duos cubitos et dimidium tenebit longitudo eius, et cubitum ac semissem latitudo.
Nova Vulgata25,18Duos quoque cherubim aureos et productiles facies ex utraque parte propitiatorii,
Nova Vulgata25,19cherub unus sit in latere uno et alter in altero; ex propitiatorio facies cherubim in utraque parte eius.
Nova Vulgata25,20Expandent alas sursum et operient alis suis propitiatorium; respicientque se mutuo, versis vultibus in propitiatorium,
Nova Vulgata25,21quo operienda est arca, in qua pones testimonium, quod dabo tibi.
Nova Vulgata25,22Et conveniam te ibi et loquar ad te supra propitiatorium de medio duorum cherubim, qui erunt super arcam testimonii, cuncta, quae mandabo per te filiis Israel.
Nova Vulgata 25,23Facies et mensam de lignis acaciae habentem duos cubitos longitudinis et in latitudine cubitum et in altitudine cubitum ac semissem.
Nova Vulgata25,24Et inaurabis eam auro purissimo; faciesque illi coronam auream per circuitum.
Nova Vulgata25,25Facies quoque ei limbum altum quattuor digitis per circuitum et super illum coronam auream.
Nova Vulgata25,26Quattuor quoque circulos aureos praeparabis et pones eos in quattuor angulis eiusdem mensae per singulos pedes.
Nova Vulgata25,27Iuxta limbum erunt circuli aurei, ut mittantur vectes per eos, et possit mensa portari.
Nova Vulgata25,28Ipsosque vectes facies de lignis acaciae et circumdabis auro, et per ipsos subvehitur mensa.
Nova Vulgata25,29Parabis et acetabula ac phialas, vasa et cyathos, in quibus offerenda sunt libamina, ex auro purissimo.
Nova Vulgata25,30Et pones super mensam panes propositionis in conspectu meo semper.
Nova Vulgata 25,31Facies et candelabrum ductile de auro mundissimo: basis et hastile eius, scyphi et sphaerulae ac flores in unum efformentur.
Nova Vulgata25,32Sex calami egredientur de lateribus, tres ex uno latere et tres ex altero.
Nova Vulgata25,33Tres scyphi quasi in nucis modum in calamo uno sphaerulaeque simul et flores; et tres similiter scyphi instar nucis in calamo altero sphaerulaeque simul et flores: hoc erit opus sex calamorum, qui producendi sunt de hastili.
Nova Vulgata25,34In ipso autem hastili candelabri erunt quattuor scyphi in nucis modum sphaerulaeque et flores.
Nova Vulgata25,35Singulae sphaerulae sub binis calamis per tria loca, qui simul sex fiunt, procedentes de hastili uno.
Nova Vulgata25,36Sphaerulae igitur et calami unum cum ipso erunt, totum ductile de auro purissimo.
Nova Vulgata25,37Facies et lucernas septem et pones eas super candelabrum, ut luceant in locum ex adverso.
Nova Vulgata25,38Emunctoria quoque et vasa, in quibus emuncta condantur, fient de auro purissimo.
Nova Vulgata25,39Omne pondus candelabri cum universis vasis suis habebit talentum auri purissimi.
Nova Vulgata25,40Inspice et fac secundum exemplar, quod tibi in monte monstratum est.