Nova Vulgata40 40,1Magistro chori. David. Psalmus.
Nova Vulgata 40,2Exspectans exspectavi Dominum, et intendit mihi.
Nova Vulgata 40,3Et exaudivit clamorem meum et eduxit me de lacu miseriae et de luto faecis; et statuit super petram pedes meos et firmavit gressus meos.
Nova Vulgata 40,4Et immisit in os meum canticum novum, carmen Deo nostro.
Videbunt multi et timebunt et sperabunt in Domino.
Nova Vulgata 40,5Beatus vir, qui posuit Dominum spem suam et non respexit superbos et declinantes in mendacium.
Nova Vulgata 40,6Multa fecisti tu, Domine Deus meus, mirabilia tua, et cogitationes tuas pro nobis: non est qui similis sit tibi. Si nuntiare et eloqui voluero, multiplicabuntur super numerum.
Nova Vulgata 40,7Sacrificium et oblationem noluisti, aures autem fodisti mihi. Holocaustum et pro peccato non postulasti,
Nova Vulgata 40,8tunc dixi: «Ecce venio. In volumine libri scriptum est de me.
Nova Vulgata 40,9Facere voluntatem tuam, Deus meus, volui; et lex tua in praecordiis meis».
Nova Vulgata 40,10Annuntiavi iustitiam tuam in ecclesia magna; ecce labia mea non prohibebo, Domine, tu scisti.
Nova Vulgata 40,11Iustitiam tuam non abscondi in corde meo, veritatem tuam et salutare tuum dixi. Non abscondi misericordiam tuam et veritatem tuam ab ecclesia magna.
Nova Vulgata 40,12Tu autem, Domine, ne prohibeas miserationes tuas a me; misericordia tua et veritas tua semper suscipiant me,
Nova Vulgata 40,13quoniam circumdederunt me mala, quorum non est numerus; comprehenderunt me iniquitates meae, et non potui videre. Multiplicatae sunt super capillos capitis mei, et cor meum dereliquit me.
Nova Vulgata 40,14Complaceat tibi, Domine, ut eruas me; Domine, ad adiuvandum me festina.
Nova Vulgata 40,15Confundantur et revereantur simul, qui quaerunt animam meam, ut auferant eam. Avertantur retrorsum et erubescant, qui volunt mihi mala.
Nova Vulgata 40,16Obstupescant propter confusionem suam, qui dicunt mihi: «Euge, euge».
Nova Vulgata 40,17Exsultent et laetentur in te omnes quaerentes te; et dicant semper: «Magnificetur Dominus», qui diligunt salutare tuum.
Nova Vulgata 40,18Ego autem egenus et pauper sum; Dominus sollicitus est mei. Adiutor meus et liberator meus tu es; Deus meus, ne tardaveris.