Nova Vulgata106 106,1ALLELUIA. Confitemini Domino, quoniam bonus, quoniam in saeculum misericordia eius.
Nova Vulgata 106,2Quis loquetur potentias Domini, auditas faciet omnes laudes eius?
Nova Vulgata 106,3Beati, qui custodiunt iudicium et faciunt iustitiam in omni tempore.
Nova Vulgata 106,4Memento nostri, Domine, in beneplacito populi tui, visita nos in salutari tuo,
Nova Vulgata 106,5ut videamus bona electorum tuorum, ut laetemur in laetitia gentis tuae, ut gloriemur cum hereditate tua.
Nova Vulgata 106,6Peccavimus cum patribus nostris, iniuste egimus, iniquitatem fecimus.
Nova Vulgata 106,7Patres nostri in Aegypto non intellexerunt mirabilia tua, non fuerunt memores multitudinis misericordiarum tuarum et irritaverunt ascendentes in mare, mare Rubrum.
Nova Vulgata 106,8Et salvavit eos propter nomen suum, ut notam faceret potentiam suam.
Nova Vulgata 106,9Et increpuit mare Rubrum, et exsiccatum est, et deduxit eos in abyssis sicut in deserto.
Nova Vulgata 106,10Et salvavit eos de manu odientis et redemit eos de manu inimici.
Nova Vulgata 106,11Et operuit aqua tribulantes eos: unus ex eis non remansit.
Nova Vulgata 106,12Et crediderunt verbis eius et cantaverunt laudem eius.
Nova Vulgata 106,13Cito obliti sunt operum eius et non sustinuerunt consilium eius;
Nova Vulgata 106,14et concupierunt concupiscentiam in deserto et tentaverunt Deum in inaquoso.
Nova Vulgata 106,15Et dedit eis petitionem ipsorum et misit saturitatem in animas eorum.
Nova Vulgata 106,16Et zelati sunt Moysen in castris, Aaron sanctum Domini.
Nova Vulgata 106,17Aperta est terra et deglutivit Dathan et operuit super congregationem Abiram.
Nova Vulgata 106,18Et exarsit ignis in synagoga eorum, flamma combussit peccatores.
Nova Vulgata 106,19Et fecerunt vitulum in Horeb et adoraverunt sculptile;
Nova Vulgata 106,20et mutaverunt gloriam suam in similitudinem tauri comedentis fenum.
Nova Vulgata 106,21Obliti sunt Deum, qui salvavit eos, qui fecit magnalia in Aegypto,
Nova Vulgata 106,22mirabilia in terra Cham, terribilia in mari Rubro.
Nova Vulgata 106,23Et dixit quia disperderet eos, nisi affuisset Moyses electus eius: stetit in confractione in conspectu eius, ut averteret iram eius, ne destrueret eos.
Nova Vulgata 106,24Et pro nihilo habuerunt terram desiderabilem, non crediderunt verbo eius.
Nova Vulgata 106,25Et murmuraverunt in tabernaculis suis, non exaudierunt vocem Domini.
Nova Vulgata 106,26Et elevavit manum suam super eos, ut prosterneret eos in deserto
Nova Vulgata 106,27et ut deiceret semen eorum in nationibus et dispergeret eos in regionibus.
Nova Vulgata 106,28Et adhaeserunt Baalphegor et comederunt sacrificia mortuorum;
Nova Vulgata 106,29et irritaverunt eum in adinventionibus suis, et irrupit in eos ruina.
Nova Vulgata 106,30Et stetit Phinees et fecit iudicium, et cessavit quassatio,
Nova Vulgata 106,31et reputatum est ei in iustitiam in generationem et generationem usque in sempiternum.
Nova Vulgata 106,32Et irritaverunt eum ad aquas Meriba, et vexatus est Moyses propter eos,
Nova Vulgata 106,33quia exacerbaverunt spiritum eius, et temere locutus est in labiis suis.
Nova Vulgata 106,34Non disperdiderunt gentes, quas dixit Dominus illis.
Nova Vulgata 106,35Et commixti sunt inter gentes et didicerunt opera eorum.
Nova Vulgata 106,36Et servierunt sculptilibus eorum, et factum est illis in scandalum.
Nova Vulgata 106,37Et immolaverunt filios suos et filias suas daemoniis.
Nova Vulgata 106,38Et effuderunt sanguinem innocentem, sanguinem filiorum suorum et filiarum suarum, quas sacrificaverunt sculptilibus Chanaan. Et infecta est terra in sanguinibus,
Nova Vulgata 106,39et contaminati sunt in operibus suis et fornicati sunt in adinventionibus suis.
Nova Vulgata 106,40Et exarsit ira Dominus in populum suum et abominatus est hereditatem suam
Nova Vulgata 106,41et tradidit eos in manus gentium, et dominati sunt eorum, qui oderunt eos.
Nova Vulgata 106,42Et tribulaverunt eos inimici eorum, et humiliati sunt sub manibus eorum.
Nova Vulgata 106,43Saepe liberavit eos; ipsi autem exacerbaverunt eum in consilio suo et corruerunt in iniquitatibus suis.
Nova Vulgata 106,44Et vidit tribulationem eorum, cum audivit clamorem eorum.
Nova Vulgata 106,45Et memor fuit testamenti sui et paenituit eum secundum multitudinem misericordiae suae.
Nova Vulgata 106,46Et dedit eos in miserationes in conspectu omnium, qui captivos duxerant eos.
Nova Vulgata 106,47Salvos nos fac, Domine Deus noster, et congrega nos de nationibus, ut confiteamur nomini sancto tuo et gloriemur in laude tua.
Nova Vulgata 106,48Benedictus Dominus, Deus Israel, a saeculo et usque in saeculum. Et dicet omnis populus: «Fiat, fiat».