Nova Vulgata - Novum Testamentum - Evangelium Secundum Lucam - 18

Evangelium Secundum Lucam

18 1Dicebat autem parabolam ad illos, quoniam oportet semper orare et non deficere, ²dicens: “ Iudex quidam erat in quadam civitate, qui Deum non timebat et hominem non reverebatur. 3Vidua autem erat in civitate illa et veniebat ad eum dicens: “Vindica me de adversario meo”. ⁴Et nolebat per multum tempus; post haec autem dixit intra se: “Etsi Deum non timeo nec hominem revereor, ⁵tamen quia molesta est mihi haec vidua, vindicabo illam, ne in novissimo veniens suggillet me ”. ⁶Ait autem Dominus: “ Audite quid iudex iniquitatis dicit; ⁷Deus autem non faciet vindictam electorum suorum clamantium ad se die ac nocte, et patientiam habebit in illis? 8Dico vobis: Cito faciet vindictam illorum. Verumtamen Filius hominis veniens, putas, inveniet fidem in terra? ”.
⁹Dixit autem et ad quosdam, qui in se confidebant tamquam iusti et aspernabantur ceteros, parabolam istam: ¹⁰“ Duo homines ascenderunt in templum, ut orarent: unus pharisaeus et alter publicanus. ¹¹Pharisaeus stans haec apud se orabat: “Deus, gratias ago tibi quia non sum sicut ceteri hominum, raptores, iniusti, adulteri, velut etiam hic publicanus; ¹²ieiuno bis in sabbato, decimas do omnium, quae possideo”. ¹³Et publicanus a longe stans nolebat nec oculos ad caelum levare, sed percutiebat pectus suum dicens: “Deus, propitius esto mihi peccatori”. ¹⁴Dico vobis: Descendit hic iustificatus in domum suam ab illo. Quia omnis, qui se exaltat, humiliabitur; et, qui se humiliat, exaltabitur ”.
¹⁵Afferebant autem ad illum et infantes, ut eos tangeret; quod cum viderent, discipuli increpabant illos. ¹⁶Iesus autem convocans illos dixit: “ Sinite pueros venire ad me et nolite eos vetare; talium est enim regnum Dei. ¹⁷Amen dico vobis: Quicumque non acceperit regnum Dei sicut puer, non intrabit in illud ”.
¹⁸Et interrogavit eum quidam princeps dicens: “ Magister bone, quid faciens vitam aeternam possidebo? ”. ¹⁹Dixit autem ei Iesus: “ Quid me dicis bonum? Nemo bonus nisi solus Deus. 20Mandata nosti: non moechaberis, non occides, non furtum facies, non falsum testimonium dices, honora patrem tuum et matrem ”. 21Qui ait: “ Haec omnia custodivi a iuventute ”. ²²Quo audito, Iesus ait ei: “ Adhuc unum tibi deest: omnia, quaecumque habes, vende et da pauperibus et habebis thesaurum in caelo et veni, sequere me ”. ²³His ille auditis, contristatus est, quia dives erat valde. 24Videns autem illum Iesus tristem factum dixit: “ Quam difficile, qui pecunias habent, in regnum Dei intrant. ²⁵Facilius est enim camelum per foramen acus transire, quam divitem intrare in regnum Dei ”. ²⁶Et dixerunt, qui audiebant: “ Et quis potest salvus fieri? ”. 27Ait autem illis: “ Quae impossibilia sunt apud homines, possibilia sunt apud Deum ”.
28Ait autem Petrus: “ Ecce nos dimisimus nostra et secuti sumus te ”. 29Qui dixit eis: “ Amen dico vobis: Nemo est, qui reliquit domum aut uxorem aut fratres aut parentes aut filios propter regnum Dei, ³⁰et non recipiat multo plura in hoc tempore et in saeculo venturo vitam aeternam ”.
31Assumpsit autem Duodecim et ait illis: “ Ecce ascendimus Ierusalem, et consummabuntur omnia, quae scripta sunt per Prophetas de Filio hominis: 32tradetur enim gentibus et illudetur et contumeliis afficietur et conspuetur, ³³et, postquam flagellaverint, occident eum, et die tertia resurget ”. ³⁴Et ipsi nihil horum intellexerunt; et erat verbum istud absconditum ab eis, et non intellegebant, quae dicebantur.
³⁵Factum est autem cum appropinquaret Iericho, caecus quidam sedebat secus viam mendicans. ³⁶Et cum audiret turbam praetereuntem, interrogabat quid hoc esset.Et cum audiret turbam praetereuntem, interrogabat quid hoc esset. 37Dixerunt autem ei: “ Iesus Nazarenus transit ”. ³⁸Et clamavit dicens: “ Iesu, fili David, miserere mei! ”. ³⁹Et qui praeibant, increpabant eum, ut taceret; ipse vero multo magis clamabat: “ Fili David, miserere mei! ”. ⁴⁰Stans autem Iesus iussit illum adduci ad se. Et cum appropinquasset, interrogavit illum: 41Quid tibi vis faciam? ”. At ille dixit: “ Domine, ut videam ”. ⁴²Et Iesus dixit illi: “ Respice! Fides tua te salvum fecit ”. ⁴³Et confestim vidit et sequebatur illum magnificans Deum. Et omnis plebs, ut vidit, dedit laudem Deo.