Dimensioni del testo

Carattere

Tema

Evidenzia versetti con note

Stai leggendo

NOVAVULGATA

Nova Vulgata

Capitoli
1
2
3
4
5
6
7
8
9
10
11
12
13
14

Osee

11
1Cum puer esset Israel, dilexi eum
et ex Aegypto vocavi filium meum.

Quanto magis vocabam eos,
tanto recesserunt a facie mea;
ipsi Baalim immolabant
et simulacris sacrificabant.
2 Quanto ... vocabam – Lege cum keqor’î; TM «vocaverunt» 
A facie mea; ipsi – Lege cum Gr et Syr mippānai hēm; TM «a facie sua»              

3Et ego dirigebam gressus Ephraim,
portabam eos in brachiis meis,
et nescierunt quod curarem eos.

In funiculis humanitatis trahebam eos,
in vinculis caritatis;
et fui eis, quasi qui elevant infantem ad maxillas suas,
et declinavi ad eum, ut vesceretur.
4 Infantem – Lege ’ûl; TM «iugum»

5Revertetur in terram Aegypti,
et Assur ipse rex eius,
quoniam noluerunt converti.

6Saeviet gladius in civitatibus eius
et consumet garrulos eius
et comedet eos propter consilia eorum.

7Populus meus pendet ad praevaricandum contra me;
vocant eum ad altum, sed simul non erigunt eum.

8Quomodo dabo te, Ephraim,
tradam te, Israel?
Quomodo dabo te sicut Adama,
ponam te ut Seboim?
Convertitur in me cor meum,
simul exardescit miseratio mea.

9Non faciam furorem irae meae,
non convertar, ut disperdam Ephraim,
quoniam Deus ego
et non homo,
in medio tui Sanctus
et non veniam in terrore.

10Post Dominum ambulabunt;
quasi leo rugiet,
quia ipse rugiet,
et in tremore accurrent filii ab occidente.

11Et avolabunt quasi avis ex Aegypto
et quasi columba de terra Assyriae;
et collocabo eos in domibus suis,
dicit Dominus.

Note al testo

2 Quanto ... vocabam – Lege cum keqor’î; TM «vocaverunt» 
A facie mea; ipsi – Lege cum Gr et Syr mippānai hēm; TM «a facie sua»              
4 Infantem – Lege ’ûl; TM «iugum»