Nova Vulgata - Vetus Testamentum - Nehemiae - 12

Nehemiae

12 ¹Hi sunt autem sacerdotes et Levitae, qui ascenderunt cum Zorobabel filio Salathiel et Iesua: Saraia, Ieremias, Esdras, ²Amaria, Melluch, Hattus, ³Sechenias, Rehum, Meremoth, ⁴Addo, Genthon, Abia, ⁵Miamin, Maadia, Belga, ⁶Semeia et Ioiarib, Iedaia, ⁷Sallu, Amoc, Helcias, Iedaia. Isti principes sacerdotum et fratrum eorum in diebus Iesua.
⁸Porro Levitae: Iesua, Bennui, Cadmihel, Serebia, Iuda, Matthanias, super hymnos ipse et fratres eius; ⁹et Becbecia atque Hanni fratres eorum coram eis per vices suas. ¹⁰Iesua autem genuit Ioachim, et Ioachim genuit Eliasib, et Eliasib genuit Ioiada, ¹¹et Ioiada genuit Ionathan, et Ionathan genuit Ieddua.

¹²In diebus autem Ioachim erant sacerdotes principes familiarum: Saraiae Maraia, Ieremiae Hanania, ¹³Esdrae Mosollam, Amariae Iohanan, ¹⁴Milicho Ionathan, Sebaniae Ioseph, ¹⁵Harim Edna, Meraioth Helci, ¹⁶Adaiae Zacharia, Genthon Mosollam, ¹⁷Abiae Zechri, Miamin Maadiae Phelti, ¹⁸Belgae Sammua, Semeiae Ionathan, ¹⁹Ioiarib Matthanai, Iedaiae Ozi, ²⁰Sellai Celai, Amoc Heber, ²¹Helciae Hasabia, Iedaiae Nathanael.

²²Levitae in diebus Eliasib et Ioiada et Iohanan et Ieddua scripti principes familiarum et sacerdotes usque ad regnurn Darii Persae. ²³Filii Levi principes familiarum scripti in libro Chronicorum usque ad dies Ionathan filii Eliasib.

24Et principes Levitarum Hasabia, Serebia, Iesua, Bennui et Cadmihel et fratres eorum coram eis, ut laudarent et confiterentur iuxta praeceptum David viri Dei per vices suas; ²⁵Matthania et Becbecia, Abdia, Mosollam, Telmon, Accub ianitores ad custodiam horreorum iuxta portas. ²⁶Hi in diebus Ioachim filii Iesua filii Iosedec et in diebus Nehemiae ducis et Esdrae sacerdotis scribaeque.
²⁷In dedicatione autem muri Ierusalem requisierunt Levitas de omnibus locis suis, ut adducerent eos in Ierusalem et facerent dedicationem in laetitia, in actione gratiarum et cantico et cymbalis, psalteriis et citharis. ²⁸Congregati sunt autem cantores de campestribus circa Ierusalem et de villis Netophathitarum  ²⁹et de Bethgalgala et de regionibus Gabaa et Azmaveth, quoniam villas aedificaverunt sibi cantores in circuitu Ierusalem.
³⁰Et mundati sunt sacerdotes et Levitae et mundaverunt populum et portas et murum. ³¹Ascendere autem feci principes Iudae super murum et statui duos magnos choros laudantium, quorum unus ivit ad dexteram super murum ad portam Sterquilinii. ³²Et ivit post eos Osaias et media pars principum Iudae ³³et Azarias, Esdras et Mosollam, ³⁴Iudas et Beniamin et Semeia et Ieremias. ³⁵Et de sacerdotibus cum tubis et Zacharias filius Ionathan filius Semeiae filius Matthaniae filius Michaiae filius Zacchur filius Asaph; ³⁶et fratres eius Semeia et Azareel, Malalai, Galalai, Maai, Nathanael et Iudas et Hanani cum musicis David viri Dei; et Esdras scriba ante eos et in porta Fontis. ³⁷Processerunt per gradus civitatis David in ascensu muri super domum David et usque ad portam Aquarum ad orientem.

³⁸Et chorus secundus gratias referentium ibat ex adverso, et ego post eum, et media pars populi super murum et super turrim Furnorum et usque ad murum latissimum ³⁹et super portam Ephraim et super portam Antiquam et super portam Piscium et turrim Hananeel et turrim Meah et usque ad portam Gregis; et steterunt in porta Custodiae.

⁴⁰Steteruntque duo chori laudantium in domo Dei, et ego et dimidia pars magistratuum mecum. ⁴¹Et sacerdotes Eliachim, Maasia, Miamin, Michaia, Elioenai, Zacharia, Hanania in tubis; ⁴²et Maasia et Semeia et Eleazar et Ozi et Iohanan et Melchia et Elam et Ezer. Et clare cecinerunt cantores et Izrahia praepositus. ⁴³Et obtulerunt in die illa sacrificia magna et laetati sunt; Deus enim laetificaverat eos laetitia magna; sed et uxores eorum et liberi gavisi sunt, et audita est laetitia Ierusalem procul.

⁴⁴Praeposuerunt quoque in die illa viros super gazophylacia ad thesaurum, ad libamina et ad primitias et ad decimas, ut colligerent in ea de agris civitatum partes legitimas pro sacerdotibus et Levitis; quia laetificatus est Iuda in sacerdotibus et Levitis, qui adstiterunt ⁴⁵et servierunt in ministerio Dei sui et in ministerio purificationis simul cum cantoribus et ianitoribus iuxta praeceptum David et Salomonis filii eius; ⁴⁶quia in diebus David et Asaph ab exordio erant catervae cantorum et carmina laudis et actionis gratiarum Deo. ⁴⁷Et omnis Israel in diebus Zorobabel et in diebus Nehemiae dabant partes cantoribus et ianitoribus per dies singulos partem suam et partes consecrabant Levitis, et Levitae consecrabant filiis Aaron.