Nova Vulgata - Vetus Testamentum - Proverbiorum - 21

Proverbiorum

21
¹Sicut rivi aquarum cor regis in manu Domini:

quocumque voluerit, inclinabit illud.
²Omnis via viri recta sibi videtur;

appendit autem corda Dominus.
³Facere misericordiam et iudicium

magis placet Domino quam victimae.
⁴Exaltatio oculorum et dilatatio cordis,

lucerna impiorum: peccatum.
⁵Cogitationes sollertis semper in abundantiam;

omnis autem festinus semper in egestate est.
6Qui congregat thesauros lingua mendacii,

vento impingetur ad laqueos mortis.
⁷Violentia impiorum detrahet eos,

quia noluerunt facere iudicium.
⁸Perversa via viri aliena est;

qui autem mundus est, rectum opus eius.
⁹Melius est sedere in angulo domatis

quam cum muliere litigiosa et in domo communi.
¹⁰Anima impii desiderat malum;

non miserebitur proximo suo.
¹¹Multato derisore sapientior erit parvulus;

et, si instruatur sapiens, sumet scientiam.
¹²Excogitat Iustus de domo impii,

ut praecipitet impios in malum.
¹³Qui obturat aurem suam ad clamorem pauperis,

et ipse clamabit, et non exaudietur.
¹⁴Munus absconditum exstinguit iras,

et donum in sinu indignationem maximam.
¹⁵Gaudium iusto est facere iudicium,

et ruina operantibus iniquitatem.
¹⁶Vir, qui erraverit a via prudentiae,

in coetu umbrarum commorabitur.
¹⁷Qui diligit convivia, in egestate erit;

qui amat vinum et pinguia, non ditabitur.
¹⁸Redemptio pro iusto impius,

et pro rectis iniquus.
¹⁹Melius est habitare in terra deserta

quam cum muliere rixosa et iracunda.
20Thesaurus desiderabilis et pinguis in habitaculo sapientis,

et imprudens homo dissipabit illum.
²¹Qui sequitur iustitiam et misericordiam,

inveniet vitam et iustitiam et gloriam.
²²Civitatem fortium ascendit sapiens

et destruit robur fiduciae eius.
²³Qui custodit os suum et linguam suam,

custodit ab angustiis animam suam.
²⁴Superbus et arrogans vocatur derisor,

qui operatur in ira superbiae.
²⁵Desideria occidunt pigrum;

noluerunt enim quidquam manus eius operari:
²⁶tota die concupiscit et desiderat;

qui autem iustus est, tribuet et non parcit. ²⁷Hostiae impiorum abominabiles,
eo magis quia offeruntur ex scelere. ²⁸Testis mendax peribit;
vir oboediens loquetur in victoriam. ²⁹Vir impius obfirmat vultum suum;
qui autem rectus est, corrigit viam suam. ³⁰Non est sapientia, non est prudentia,
non est consilium contra Dominum. ³¹Equus paratur ad diem belli,
Dominus autem salutem tribuit.