Nova Vulgata1313,1Vani autem sunt natura omnes homines, in quibus non subest scientia Dei; et de his, quae videntur bonis, non potuerunt intellegere eum, qui est, neque operibus attendentes agnoverunt artificem.
Nova Vulgata 13,2Sed aut ignem aut spiritum aut citatum aerem aut gyrum stellarum aut violentam aquam aut luminaria caeli, rectores orbis terrarum, deos putaverunt.
Nova Vulgata 13,3Quorum si specie delectati, illa deos putaverunt, sciant quanto his dominator eorum melior est: speciei enim principium et auctor constituit ea.
Nova Vulgata 13,4Si autem virtutem et operationem eorum mirati, intellegant ab illis quanto, qui haec fecit, fortior est illis:
Nova Vulgata 13,5a magnitudine enim et pulchritudine creaturarum cognoscibiliter potest creator horum videri.
Nova Vulgata 13,6Sed tamen in his minor est querela, et hi enim fortasse errant Deum quaerentes et volentes invenire.
Nova Vulgata 13,7Etenim, cum in operibus illius conversentur, inquirunt et credunt visui, quoniam pulchra sunt, quae videntur.
Nova Vulgata 13,8Iterum autem nec his potest ignosci:
Nova Vulgata 13,9si enim tantum valuerunt scire, ut possent aestimare saeculum, quomodo huius Dominum non facilius invenerunt?
Nova Vulgata 13,10Infelices autem, et in rebus mortuis sunt spes illorum, qui appellaverunt deos opera manuum hominum, aurum et argentum, artis inventionem et similitudines animalium, aut lapidem inutilem, opus manus antiquae.
Nova Vulgata 13,11Aut si quis artifex faber de silva tractabile lignum secuerit — huius docte erasit omnem corticem et arte sua usus diligenter fabricavit vas utile in conversationem vitae;
Nova Vulgata 13,12reliquiis autem eius operis ad praeparationem escae abusus, satiatus est,
Nova Vulgata 13,13et reliquum horum, quod ad nullos usus facit, lignum curvum et nodis concretum accipiens, sculpsit diligenter per vacuitatem suam et per scientiam tempore requiei figuravit illud — assimilavit illud imagini hominis
Nova Vulgata 13,14aut alicui ex vilibus animalibus illud comparavit, perliniens rubrica et rubicundum faciens fuco colorem illius et omnem maculam, quae in illo erat, perliniens
Nova Vulgata 13,15et faciens ei dignam habitationem in pariete posuit illud, confirmans ferro.
Nova Vulgata 13,16Ne igitur forte caderet providit illi, sciens quoniam non potest se ipsum adiuvare: imago enim est, et opus est illi adiutorium.
Nova Vulgata 13,17Et de substantiis et de nuptiis et de filiis votum faciens, non erubescit loqui cum illo, quod sine anima est, et pro sanitate quidem infirmum deprecatur
Nova Vulgata 13,18et pro vita rogat mortuum et in adiutorium rem omnino inutilem invocat, et pro itinere petit ab eo, quod ambulare non potest,
Nova Vulgata 13,19et de acquirendo et de operando et de bono manuum eventu petit utilitatem ab eo, quod prorsus inutile est manibus.
