Nova Vulgata - Vetus Testamentum - Primus Maccabaeorum - 9

Primus Maccabaeorum

9 ¹Et audivit Demetrius quia cecidit Nicanor et exercitus eius in proelio et apposuit Bacchidem et Alcimum rursum mittere in terram Iudaeae et dextrum cornu cum illis. 2Et abierunt viam, quae ducit in Galgala, et castra posuerunt in Masaloth, quae est in Arbelis, et occupaverunt eam et peremerunt animas hominum multas. ³Et mense primo anni centesimi et quinquagesimi secundi applicuerunt ad Ierusalem; 4et surrexerunt et abierunt in Bereth in viginti milibus virorum et duobus milibus equitum. ⁵Et Iudas posuerat castra in Elasa, et tria milia viri electi cum eo; ⁶et viderunt multitudinem exercitus quia multi sunt et timuerunt valde; et multi subtraxerunt se de castris, et non remanserunt ex eis nisi octingenti viri. ⁷Et vidit Iudas quod defluxit exercitus suus, et bellum perurgebat eum; et confractus est corde, quia non habebat tempus congregandi eos, ⁸et dissolutus est. Et dixit his, qui residui erant: «Surgamus et ascendamus ad adversarios nostros, si poterimus pugnare adversus eos». ⁹Et avertebant eum dicentes: «Non poterimus, sed liberemus animas nostras modo et revertamur nos et fratres nostri et pugnabimus adversus eos; nos autem pauci sumus». ¹⁰Et ait Iudas: «Absit istam rem facere, ut fugiamus ab eis; et si appropiavit tempus nostrum, et moriamur in virtute propter fratres nostros et non inferamus crimen gloriae nostrae». ¹¹Et movit exercitus de castris, et steterunt illis obviam; et divisi sunt equites in duas partes, et fundibularii et sagittarii praeibant exercitum, et primi certaminis omnes potentes. ¹²Bacchides autem erat in dextro cornu; et proximavit legio ex duabus partibus, et clamabant tubis; et clamaverunt hi, qui erant ex parte Iudae, etiam ipsi in tubis; ¹³et commota est terra a voce exercituum; et commissum est proelium a mane usque ad vesperam.
¹⁴Et vidit Iudas quod Bacchides et firmior pars exercitus erat in dextris, et convenerunt cum ipso omnes constantes corde; ¹⁵et contrita est dextera pars ab eis, et persecutus est eos usque ad montem Azoti. ¹⁶Et, qui in sinistro cornu erant, viderunt quod contritum est dextrum cornu, et secuti sunt post Iudam et eos, qui cum ipso erant, a tergo. ¹⁷Et ingravatum est proelium, et ceciderunt vulnerati multi ex his et ex illis; ¹⁸et Iudas cecidit, et ceteri fugerunt. ¹⁹Et Ionathas et Simon tulerunt Iudam fratrem suum et sepelierunt eum in sepulcro patrum suorum in Modin. ²⁰Et fleverunt eum et planxerunt omnis populus Israel planctu magno et lugebant dies multos ²¹et dixerunt: «Quomodo cecidit potens, qui salvum faciebat populum Israel!».
²²Et cetera verborum Iudae et bellorum et virtutum, quas fecit, et magnitudinis eius non sunt descripta; multa enim erant valde.
²³Et factum est, post obitum Iudae emerserunt iniqui in omnibus finibus Israel, et exorti sunt omnes, qui operabantur iniquitatem. ²⁴In diebus illis facta est fames magna valde, et tradidit se regio cum ipsis. ²⁵Et elegit Bacchides viros impios et constituit eos dominos regionis; ²⁶et exquirebant et perscrutabantur amicos Iudae et adducebant eos ad Bacchidem, et vindicabat in illos et illudebat. ²⁷Et facta est tribulatio magna in Israel, qualis non fuit ex die, qua non est visus propheta illis.
²⁸Et congregati sunt omnes amici Iudae et dixerunt Ionathae: ²⁹«Ex quo frater tuus Iudas defunctus est, et vir similis ei non est, qui exeat contra inimicos et Bacchidem et eos, qui inimici sunt gentis nostrae; ³⁰nunc itaque te hodie elegimus esse pro eo nobis in principem et ducem ad bellandum bellum nostrum». ³¹Et suscepit Ionathas tempore illo principatum et surrexit loco Iudae fratris sui.
³²Et cognovit Bacchides et quaerebat eum occidere; ³³et cognovit Ionathas et Simon frater eius et omnes, qui cum eo erant, et fugerunt in desertum Thecue et consederunt ad aquam lacus Asphar. ³⁴Et cognovit Bacchides die sabbatorum et venit ipse et omnis exercitus eius trans Iordanem. ³⁵Et Ionathas misit fratrem suum ducem populi et rogavit Nabathaeos amicos suos, ut commodarent illis apparatum suum, qui erat copiosus. ³⁶Et exierunt filii Iambri ex Medaba et comprehenderunt Ioannem et omnia, quae habebat, et abierunt habentes ea. ³⁷Post haec verba renuntiatum est Ionathae et Simoni fratri eius quia filii Iambri faciunt nuptias magnas et ducunt sponsam ex Nadabath filiam unius de magnis principibus Chanaan cum ambitione magna. ³⁸Et recordati sunt sanguinis Ioannis fratris sui et ascenderunt et absconderunt se sub tegumento montis; ³⁹et elevaverunt oculos suos et viderunt: et ecce tumultus et apparatus multus, et sponsus processit et amici eius et fratres eius obviam illis cum tympanis et musicis et armis multis. ⁴⁰Et surrexerunt ad eos ex insidiis et occiderunt eos, et ceciderunt vulnerati multi; et residui fugerunt in montes, et acceperunt omnia spolia eorum. ⁴¹Et conversae sunt nuptiae in luctum, et vox musicorum ipsorum in lamentum. ⁴²Et vindicaverunt vindictam sanguinis fratris sui et reversi sunt ad ripam Iordanis.
⁴³Et audivit Bacchides et venit die sabbatorum usque ad oram Iordanis in virtute magna. ⁴⁴Et dixit ad suos Ionathas: «Surgamus et pugnemus pro animabus nostris; non est enim hodie sicut heri et nudiustertius: ⁴⁵ecce enim bellum ex adverso nostrum, aqua vero Iordanis hinc et inde, et paludes et saltus, et non est locus divertendi. ⁴⁶Nunc ergo clamate in caelum, ut liberemini de manu inimicorum vestrorum». Et commissum est bellum. ⁴⁷Et extendit Ionathas manum suam percutere Bacchidem, et divertit ab eo retro. ⁴⁸Et dissiliit Ionathas et, qui cum eo erant, in Iordanem et transnataverunt in ulteriora; et non transierunt ad eos Iordanem. ⁴⁹Et ceciderunt de parte Bacchidis die illa mille viri. Et reversi sunt in Ierusalem. ⁵⁰Et aedificaverunt civitates munitas in Iudaea: munitionem, quae erat in Iericho, et Emmaus et Bethoron et Bethel et Thamnata et Pharathon et Tephon muris excelsis et portis et seris; ⁵¹et posuit custodiam in eis, ut inimicitias exercerent in Israel. ⁵²Et munivit civitatem Bethsuram et Gazaram et arcem et posuit in eis auxilia et apparatum escarum. ⁵³Et accepit filios principum regionis obsides et posuit eos in arce in Ierusalem in custodia.
⁵⁴Et anno centesimo quinquagesimo tertio, mense secundo, praecepit Alcimus destrui murum atrii sanctorum interioris et destruxit opera prophetarum. Et coepit destruere. ⁵⁵In tempore illo percussus est Alcimus, et impedita sunt opera illius; et occlusum est os eius, et dissolutus est nec ultra poterat loqui verbum et mandare de domo sua; ⁵⁶et mortuus est Alcimus in tempore illo cum tormento magno. ⁵⁷Et vidit Bacchides quoniam mortuus est Alcimus et reversus est ad regem; et siluit terra Iudae annis duobus.
⁵⁸Et cogitaverunt omnes iniqui dicentes: «Ecce Ionathas et, qui cum eo sunt, in silentio habitant confidentes; nunc ergo adducamus Bacchidem, et comprehendet eos omnes una nocte». ⁵⁹Et abierunt et consilium ei dederunt.  ⁶⁰Et surrexit, ut veniret cum exercitu multo, et misit occulte epistulas sociis suis, qui erant in Iudaea, ut comprehenderent Ionathan et eos, qui cum eo erant; et non potuerunt, quia innotuit eis consilium eorum. ⁶¹Et apprehenderunt de viris regionis, qui principes erant malitiae, quinquaginta viros et occiderunt eos. ⁶²Et secessit Ionathas et Simon et, qui cum eo erant, in Bethbasi, quae est in deserto; et exstruxit diruta eius, et firmaverunt eam. ⁶³Et cognovit Bacchides et congregavit universam multitudinem suam et his, qui de Iudaea erant, denuntiavit; ⁶⁴et venit et castra posuit ad Bethbasi et oppugnavit eam dies multos et fecit machinas. ⁶⁵Et reliquit Ionathas Simonem fratrem suum in civitate et exiit in regionem et venit cum numero; ⁶⁶et percussit Odomera et fratres eius et filios Phasiron in tabernaculo ipsorum et coepit caedere et crescere in virtutibus. ⁶⁷Simon vero et, qui cum ipso erant, exierunt de civitate et succenderunt machinas ⁶⁸et pugnaverunt contra Bacchidem, et contritus est ab eis, et afflixerunt eum valde, quoniam consilium eius et adventus eius erat inanis. ⁶⁹Et iratus est animo contra viros iniquos, qui ei consilium dederant, ut veniret in regionem, et multos ex eis occiderunt; et cogitaverunt abire in regionem eius. ⁷⁰Et cognovit Ionathas et misit ad eum legatos componere pacem cum ipso et reddere ei captivitatem. ⁷¹Et accepit et fecit secundum verba eius et iuravit se nihil facturum ei mali omnibus diebus vitae eius; ⁷²et reddidit ei captivitatem, quam prius erat praedatus de terra Iudae, et conversus abiit in terram suam et non apposuit amplius venire in fines eius. ⁷³Et cessavit gladius ex Israel, et habitavit Ionathas in Machmas; et coepit Ionathas ibi iudicare populum et exterminabat impios ex Israel.